افلام سقطت من ذاكرة ابطالها

 

مقدمة:

السينما المصرية فيها عدد كبير جدا من الافلام المتنوعة و في بعض الأحيان غير المتوقعة...في بعض الأفلام لبعض الفنانيين كانت في بداياتهم و تعتبر في نظر الكثير من الناس بداية بدائية أكتر من جدا...ممكن من كتر ما الافلام دي في الضياع يكون البطل او البطلة نسيوهم اصلا..

الافلام دي غالبا مسيماتها متشابهة و دايما تلاقي فيها كلمة (شيطان...مراهقة- لازم تكون انثى....رغبة...إمرأة...جنون....) و امثالها من الكلمات المفتعلة عشان تواكب فترة النكسة و يليها فترة الانتصار مرورا بالانفتاح العظيم – في كل حاجه حرفيا..

الحلقة الأولى: ميرفت

أولا ده مش انتقاص منها أو تريقة عليها ده مجرد نقد لافلام هي عملتها في أغرب فترات السينما المصرية و عشان انا بحبها جدا كممثلة فأكيد اتفرجت على اغلب اعمالها في الفترة دي، أولها:

- 3 فتيات مراهقات:

طبعا الاسم مثالي لفترتها..الفيلم انتاج سنة 1970 يعني بعد النكسة بتلت سنين فممكن تصنيفه بجدارة على أنه من افلام النكسة..مع أنه مصنف على أنه فيلم اثارة و دراما عشان طبعا الناس تشوفه...و المفاجأة ان الفيلم بطولة سهير رمزي كمان

بغض النظر عن أن المخرج أسمه عبد الرحمن كيخا و أن اعماله التانية –الهي فيلمين كمان- من نفس العينة...القصة غير شيقة فعلاَ!

طبعا عشان التريند يبقى صح لازم مريم فخر الدين هي الأم...و لازم يبقى فيه سنيد كوميي ممتع وسط الدراما العميقة فعندك محمد رضا  اسمه المعلم رضا برضه...

ميرفت أسمها سامية ...معقدة من الجواز و هي الاخت الكبيرة و المراهقتين التانيين هالة- سهير رمزي – و صفاء- ممثلة أسمها هالة الشواربي- مش عارفين يتجوزوا منها...و مامي كمان عايزة تتجوز حبها القديم المعلم رضا...

سامية فتاة لعبية بتلعب بالقلوب و بترفض الجواز

 بس برضوا سامية عاقلة و بتقرا كتب ..هوووب من السرير عالكتاب بمكياجها بباروكتها بكله...لا و مش أي كتاب ده كتاب في الفلسفة!

عشان محرقشي الفيلم و شخصية سامية المعقدة و الكلنا مش فاهمنها..هوجه بس بعض النقد الغير بناء عشان الفيلم نفسه محدش فاكره غيرنا:

-        الفيلم ينصح بمشاهدته تحت اشراف عائلي: هل ده عشان في كلمة جنس و لا عشان مدام ميرفت و مدام سهير لابسين قصير؟

-        يوسف شعبان- الهو البطل- اسمه سبق اسم الفيلم نفسه...و ده يرجعنا لنقطة افلام النكسه: هل يوسف شعبان هو بطل النكسه؟

-        الفيلم بيتكلم عن مراهقات و متخرجين من الجامعه.!.و ده ياخدنا لفرضية من الاتنين:

إما أن في فترة النكسة المراهقة مدت للعشرينات

أو أن التعليم كان متطور جدا و الواحدة كانت بتتخرج 16 سنة

-        يوسف فخر الدين طلع في أول مشهد بس مجاملة من المخرج عشان أخته

-        إبراهيم خان مينفعشي متحرش (شوف الفيلم و أنت تفهمني)

-        مهما كان الافتعال و المبالغة و نوعية البواريك..الباروكة اللبستها ميرفت في الفيلم ملهاش مثيل و لا في أي لووك لعروسةBarbie

-        عمر خورشيد- الله يرحمه- مين ضحك عليه و أقنعه بالتمثيل؟

 

مميزات الفيلم:

-        هي ميزة واحدة- ولأ مش أن ميرفت أمين حلوة و لابسة قصير-الميزه هي الموسيقى التصويرية لعمر خورشيد ...

 

لو فاضي و عندك صبر و تقدر تعمل نفسك مش واخد بالك من أي تناقضات  اتفرج على الفيلم تحت في اللينك بس و أنبني اشرحلي النهاية في التعليقات تحت عشان مفهمتهاش

 

 

- حب المراهقات:

احنه ماشيين صح اهو في تريند الاسامي...الفيلم ده برضو انتاج سنة 70... و كمان في اسامي كبيرة زي أحمد مظهر...

أحمد مظهر هو الأكتشف ميرفت و طلعها معاه في مسلسل و في الفيلم الاجتماعي الكبير ده-وفقا للمقدمة...

و طبعا أحمد مظهر هو أبوه ميرفت و أسمه حمدي إبراهيم، راجل يرأس جمعية انصار الفضيلة و شديد – بغض النظر عن طول فستان ميرفت بنته- الهي ميرفت أمين برضه..

البنت هتسيب المنصورة و تدرس في القاهرة و تتوالى الأحداث الكوميدية و الأب بيحلق عليها...ما هي حلوة و لابسة قصير!

طبعا مننساش الحته الكوميدي الهي المرادي عادل إمام...و يوسف فخر الدين معانا تاني بس مش متجامل المرادي- بالاشتراك مع الجميلة جدا مديحة و معانا فنانة معتزلة – إن كنت تعرفها- اسمها ناهد يسري...ايوه هي يا سووووسة بتاعت سيدة الأقمار السوداء بس كانت اياميها لسه بتدرس الأقمار..نخش على النقد:

 

-        ناهد يسري و مديحة كامل مينفعشي يجتمعوا في عمل واحد عشان شبه بعض جدا...ممكن تفرق ما بينهم بالفستان.. بس مش بطوله

-        في ممثل أسمه عادل عثمان- المتحرش الرسمي للفيلم..ده ممثل عراقي قدير في العراق...السؤال: ليه عراقي؟ دي سنين نكسة خلوه الناس تكسب عيش و لا عشان القومية العربية!

-        عندك في مشهد مديحة فضلت ماشية مااااشية في الصحرا بفستان مقطوع و بكامل مكياجها...هنا التساؤل:

-        الصحرا دي فين وقبلها بدقيقه كانوا في العمار

-        هي البلد كانت أمان كده لدرجة أن مديحة شخصيا تمشي بفستان مقطوع؟

 

-        ميرفت أمين مؤمنة بالصداقة البريئة...و دي القضية الاجتماعية الكبيرة الهتحولك الفيلم من كوميدي خفيف لقضية اجتماعية غير عميقة...مش هحرق الأحداث

-        المفاجأة...الحج رشوان توفيق معانا برضو بس كان شاب عاقل و مسرح عالجمب..

 

 

أفضل ما في الفيلم

-        أه معاك المرادي.كلهم مزز و حلوين أوي.. بس فعلا الفيلم ده مش لقينلوه أي ميزة غيرانحلال جمعية أنصار الفضيلة و رقصة ناهد يسري وصورة الكواليس المعروضة...غير كده مش هحرقه...

الفيلم مش ممل بس متخلف شويتين ...لو زهقان و بتدور على فيلم قديم مع الشيبسي..مفيش أحسن من ده..بس مترجعشي تدعي عليا!

 

 

-        شلة مراهقين:

بالرغم من أن أسم الفيلم معانا عالخط..إلا أنه إنتاج سنة 1973 يعني بعد ما خلينا السلاح صاحي و انتصاااارناا و ده المفروض تاريخيا يخرجه من تصنيف أفلام النكسه بس الفيلم برضه لسه في نكهة أفلام النكسة المتميزة..

قبل ما تتفرج عالفيلم هيضحكوا عليك و يقلولك أنه بطولة ميرفت (نانا و متحاولش تعرف أسمها الحقيقي أيه....) بس الحقيقة أنها شاركت في الفيلم بأربع خمس مشاهد ممكن أي واحدة حلوة و شعرها مصبوغ أصفر تعملهم..الفيلم طبعا فيه مريم فخر الدين كعنصر رئيسي في الأفلام دي بس أخوها مش معانا المرادي...و الحته الكوميدي الخفيفه كالعادة لمحمد رضا في دور معلم منعرفشي عنه غير أنه ابو زغلول و بيتجوز كتير

نخش عالأبطال التقريبا اغلبهم ممثلشي غير الفيلم ده...

1- رئيس الشلة (عادل المش مراهق) : ممثل أسمه محمد أسامة...أتحداك و جبت عنه أي معلومة غير عن طريق موقع elcinema.com

كل النعرفه عنه أنه ممثل مش بيعرف يمثل و بيمثل عشان المخرج و البنات شافوه وسيم غير كده الراجل مثل فيلمين و قرر يفضحنا ويهاجر يمثل في أمريكا  و الله أعلم الفضيحة أتلمت هناك ازاي..إلا إذا كانت هوليووود عندها نكسة أياميها..

2-محمد يحيي( صفوت الينفع مراهق): بغض النظر عن أن صعب تلاقي مراهق أسمه صفوت بس ييجي منه..

المشكلة الأساسية الهتواجهها معاه أنك هتفضل تشبه عليه طول الفيلم ..أنا هجبلك من الأخر كان في فيلم الحفيد برضو مع ميرفت وبرضو مراهق ...الراجل ده عمله فيلمين تلاته و هو مراهق و الحمد لله كبر و عقل و بطل تمثيل

3- حمدي حافظ (ميمي الطفل المراهق): حاول مش تتلخبط بينه و بين المراهق رقم 2 عشان الاتنين شعرهم بالجمب... ده بقه  الفنان المكمل معانا أفلام لحد التمانينات و بعدين دخل في مسلسلات دينية...لو بتشبه عليه أو تعتقد أنك شوفته في مسرحية أطفال فانا برضو عندي نفس الاعتقاد..

4-فاروق يوسف (زغلول المش مراهق برضك): هتعرفه من شكله عشان كان بيطلع في أدوار ثانوية كتير.. بس عمرك ما هتعتقد أن ليه أسم و تقريبا ده الوحيد الواخد باله أنه بيمثل مش بيسمع الحوار بس...

نخش عالمهم:

أول حاجه عيزك تنسى خالص أسطورة أن الفيلم بطولة أحمد رمزي...عشان مش هتشوفه كتير و احتمال متعرفوش بالشنب...أهم حاجه الفيلم بطولة شلة ممثلين مبيعرفوش يمثلوا...

و برضو لازم تركز في الدور المحوري لدوريات الشرطة و الافلام البوليسية في إخراج عمل زي ده للظلام و الفشل...

و حاول على أد ما تقدر مش تركز مع الوقت...يعني لو لقيت واحدة بتولد في يوم و نص أو الليل بقه نهار و بعدين رجع ليل تاني عاااادي جدا...

دي أمور ثانوية و لازم نراعي أن المخرج كان عارف أن شلة المراهقين دول عندهم امتحانات فوقت ما بيفضوا بييجوا عشان يخلصوا المشهد..

 و أخيرا و ليس أخرا...الفيلم ممكن تلعن و تسب بعد ما تخلصوا..بس صدقني لو دققت شوية هتلاقي ميزه...اييه؟ أن ودانك جابت موسيقى في الخلفية لناس اسمهم Rare earth كانوا بيغنوا في السبعينات...و عشان متحسش بالندم  أنك شوفت الفيلم هحطلك لينك الأغنيتين تسمعهم و تدور عليهم في و انت بتتفرج عشان متزهقشي...

الفيلم ملوش قصة تقريبا غير أنهم بيدوروا على فلوس عشان المزز بتعاتهم..متحاولشي تدور على نهاية منطقية و دايما خليك فاكر أن الفيلم عبرة و عظة لكل مراهق سبعيناتي...

 

 

-        هاربات من الحب:

 

الفيلم برضو انتاج سنة 70 و يمثل انتكاسة من شوية الانتكاسات  المحترمة في تاريخ السينما..

أولا إذا كنت فاكر نفسك هتتفرج على فيلم فده بس المحتوى الخارجي بس حقيقة هو مجموعة من المشاهد غير المترابطة تتمنى أن يتخللها إعلانات عشان تهرب أنت نفسك من الفرجة..

ثانيا إذا كنت نفسك هتطلع بمقاطع ساخنة أو بلبس من إياه فتأكد أن ده عقاب ربنا فيك عشان نيتك وحشة...

 المش قصة : ميرفت بنت فقيرة أسمها سامية – تااااني (راجع 3 فتيات مراهقات )بتحب واحد غني أسمه صلاح( أحمد رمزي معانا تاني) و هتطلع بنت السواق بتاعهم...هتقولي القصه تقليدية هقلك لا خاااااااالص...لأن عندك ممثل قديم أسمه (عباس فارس) تدخل بمجموعة من المشاهد الكوميدية اللزجة عشان الجوازة تتم..أنا مش بحرق القصة عشان هي مش موجودة أصلا!

الفيلم المفروض بيتكلم عن إذابة الطبقات الاجتماعية و ده ملوش علاقة أن مدام نبيلة عبيد معانا في دور الفتاة المتدلعة الفاسدة..

هتقولي مين الهاربات...إالهام (نبيلة عبيد)...مين الفتيات إلهام برضك....مين الحب سوبحااان الله هي برضو...

في وسط الفيلم عادي أنك تلاقي نفسك بتلعب في الموبايل أو بتبص عالفيسبوك و نصيحة ممكن تتفرج عليه على مرحلتين تلاتة و تاخد بريك في النص..

مفاجأت الفيلم عشان مفهوش مميزات:

1- الضيف أحمد كان تقريبا متخانق مع سمير و جورج فطلع في دور ثانوي مش كوميدي أو يمكن كوميدي و انا مخدتش بالي

2- مظهر أبو النجا طلع في مشهد واحد و هتعرفه متقلقشي

3-سعيد صالح هو المتحرش الرسمي للفيلم

4- نبيلة عبيد كان شكلها بني آدم عادي و بقها بيتحرك عادي زينا

5- لو قدرت تتفرج ياريت تقولي فين الحتة الكوميدي أو الممثل الكوميدي المعانا المرادي

لينك الفيلم تحت و نصيحة لو ناوي تتفرج....حاول تصفي النية عشان ربنا يلهمك الصبر و السلوان...